BREAKING NEWS

“ජේ.ආර් ජයවර්ධනගේ ‘ධර්මිෂ්ඨ සමාජය’ හදන පාලනයෙන් මේ රටේ 60,000ක් මියගියා. අනුර දිසානායකගේ ‘ශිෂ්ටත්වය‘ හදන 20 වැනි සංශෝධනයෙන්’ ද එවැනි ඛේදවාචකයක් රටට ඉතිරි කරාවි”

“ජේ.ආර් ජයවර්ධනගේ ‘ධර්මිෂ්ඨ සමාජය’ හදන පාලනයෙන් මේ රටේ 60,000ක් මියගියා. අනුර දිසානායකගේ ‘ශිෂ්ටත්වය‘ හදන 20 වැනි සංශෝධනයෙන්’ ද එවැනි ඛේදවාචකයක් රටට ඉතිරි කරාවි”

– ජානිපෙ නායක විමල් වීරවංශ

‘ධර්මිෂ්ඨ සමාජයක්’ තොරොම්බල් කරමින් බලයට පැමිණි ජේ.ආර් ජයවර්ධන පාලනය අවසානයේ මේ රටේ තරුණ තරුණියන් 60,000කට දිවි අහිමි කළ අයුරින් ‘ශිෂ්ඨත්වය’ තොරොම්බල් කරමින් බෙදුම්වාදීන්ගේ උවමනාවට රැගෙන එන ‘20 වැනි සංශෝධනය’ ද මෙරටට එවැනි ඉරණමක් උදා කර දෙනු ඇති බව ජානිපෙ, නායක විමල් වීරවංශ මහතා පෙන්වා දෙයි.

ඊයේ (07) ‘රටට හතුරු 20 එපා!’ යන තේමාව යටතේ ‘රට රකින ජනපවුර’ සංවිධානය විසින් පවත්වන ලද විරෝධතා ජනසමුළුව අමතමින් ඒ මහතා මෙසේ පැවසීය.

එහිදී වැඩිදුරටත් අදහස් දැක් වූ විමල් වීරවංශ මහතා මෙසේ ද සදහන් කළ්ය.

නව ලිබරල්වාදය කියන්නේ සරලව ගතහොත් ලෝක බලවතුන්ගේ අභිලාෂයන් මුදුන්පත් කරගැනීමට ඒ ඒ ජාතික රාජ්‍යයන් තුළ පවතින බාධාවන් සියල්ල ඉවත් කර දී ඒ අභිලාෂයන් රිසි සේ ඉටුකර ගැනීමට ඉඩකඩ හදා දීමයි. ජාතික රාජ්‍යයක් තුළ ආර්ථිකමය, දේශපාලනමය වශයෙන් එසේ පවතින බාධාවන් ඉවත් කළ යුතුයි.

‘කළු සල්ලි ගලා ඒම’

ශ්‍රී ලංකාව තුළ ආර්ථිකමය වශයෙන් පවතින බාධාවන් ඉවත් කර ගැනීමට තමයි විනිමය පාලන පනත, සංශෝධනය වන්නේ. විදේශ මුදල් ශ්‍රී ලංකාව තුළට ගෙන ඒමේදී සහ ආපසු රැගෙන යාමේදී මහ බැංකුවට මෙතෙක් පැවති අධීක්ෂණය ඉවත් කර දීමයි එහිදී සිදුවූයේ. මේ සංශෝධනයට පෙර මහ බැංකු අධීක්ෂණයෙන් තොරව ශ්‍රී ලංකාවට විදෙස් මුදල් ප්‍රමාණයක් රැගෙන ආ රවී කරුණානායක මහතාට නඩු පැවරුණු ආකාරය ඔබට මතක ඇති. දැන් ඒ බාධාව ඉවත් කර දී තිබෙනවා. අද ශ්‍රී ලංකාව කළු සල්ලි සුදු සල්ලි බවට පත් කරන තිප්පොළක් බවට පත්ව තිබෙනවා. මේ වනවිට කොටි සංවිධානය සතුව පැවැති කළු සල්ලි අරන් ඇවිත් ලයිකා මොබයිල් නැමති කුප්‍රකට සමාගම ඊ.ඒ.පී මාධ්‍ය ජාලය ඇතුළු සමූහ ව්‍යාපාරය මිලදී ගනිමින් සිටිනවා. විදේශිකයන් කළු සල්ලි ගෙන එන්නේ දේපළ මිලදී ගන්න. අපේ ආණ්ඩුව කාලයේ දේපළ මිලදී ගැනීමේදී විදේශිකයින්ට පනවා තිබූ 100% ක බද්ද අද ඉවත් කර තිබෙනවා. ඒ නිසා ශ්‍රී ලංකාවට වැඩි වැඩියෙන් කළු සල්ලි එනවා. මෙසේ බාධාවන් ඉවත් කර දුන්නාම නව ලිබරල්වාදයට ශ්‍රී ලංකාවේ ආර්ථිකය තම ග්‍රහණයට ගත හැකියි.

‘න්‍යෂ්ටික අපද්‍රව්‍ය බැහැර කරන මීතොටමුල්ලක්’

පසුගියදා අත්සන් තැබූ ශ්‍රී ලංකා සිංගප්පූරු වෙළඳ ගිවිසුමෙන් ශ්‍රී ලංකාව තුළට න්‍යෂ්ටික අපද්‍රව්‍ය පවා රැගෙන ඒමට සිංගප්පූරුවට ඉඩකඩ ලබාදී තිබෙනවා. ඒ අනුව ඉදිරියේදී න්‍යෂ්ටික අපද්‍රව්‍ය බැහැර කරන මීතොටමුල්ලක් බවට ශ්‍රී ලංකාව පත් වෙනවා. නව ලිබරල්වාදයට ජාතික රාජ්‍යයේ ආර්ථිකය ග්‍රහණයට ගත්තාට මදි. ජාතික රාජ්‍යයක් ව්‍යුහාත්මකව අබල දුබල කරන්න ඕනෙ. ඒකට තමයි ඇමරිකා එක්සත් ජනපදය හා යුරෝපා සංගමයේ රටවල් නව ආණ්ඩුක්‍රම ව්‍යවස්ථාවක් ගෙන එන්න කීවේ. ජනතා විරෝධය නිසා එම කටයුත්ත දුර්මුඛ වී ඇති නිසයි, ඒ ශ්‍රී ලංකා රාජ්‍යය අබල දුබල කිරීමේ නව ලිබරල්වාදයේ ඊළඟ තුරුම්පුව ලෙස 20 වැනි ආණ්ඩුක්‍රම ව්‍යවස්ථා සංශෝධනය රැගෙන එන්නේ.

‘ජනාධිපති සංක්‍රාන්තික ලිංගිකයකු වෙලා’

අනුර දිසානායකගේ 20 වැනි සංශෝධනයෙන් ජනාධිපති ධුරය අහෝසි කර නැහැ. මහා සංඝරත්නය හා ජනතාවගෙන් පැමිණි විරෝධතා නිසා නාමමාත්‍රික කීවට නාමමාත්‍රික නොවන ජනාධිපති ධූරයක් ඉතිරි කර තිබෙනවා. රටේ ජනතාවට ජනාධිපති තේරීමට තිබූ අවස්ථාව වන ජනාධිපතිවරණය අහෝසි කරන්න එයා යෝජනා කරලා තිබෙනවා. රාජ්‍ය නායකයා, කැබිනට් මණ්ඩලයේ ප්‍රධානියා නොවුණාට මේ අනුර දිසානායක යෝජනා කරන ජනාධිපතිට විධායකයේ ප්‍රධානියා, සන්නද්ධ හමුදාවන්හි සේනාධිනායකයා යන දැනට තිබෙන නාමකරණ ඉතිරි කර තිබෙනවා. දේශපාලන පක්ෂයක සාමාජිකයෙකු නොවන පාර්ලිමේන්තු මන්ත්‍රීවරයෙකු ද නොවන මේ ජනාධිපතිවරයා තෝරා පත් කරන්නේ අර අනුර දිසානායක පවසන ‘හරකුන්, කුකුළන් විදිහට විකිණෙන පාර්ලිමේන්තු මන්ත්‍රීවරුන්ගේ’ ඡන්දයෙන්. අපි හිතමුකෝ අර්ජුන් ඇලෝසියස්ට මේ ජනාධිපති ධුරය ලබා ගන්න හිතුණා කියලා. එහෙම නම් කලින් විදිහටම මන්ත්‍රීවරු 118ක් සල්ලිවලට ගත්තාම වැඩේ හරි. පසුගිය දිනවල කථාබහට ලක් වුණු තමන්ගේ උපන් දින සාදයට රුපියල් ලක්ෂ 275 ක් වියදම් කළ රූපලාවණ්‍ය ශිල්පියාටත් මේ වැඬේ කරගන්න පුළුවන් වේවි. රාජ්‍ය නායකයාත් නොවන, කැබිනට් මණ්ඩලයේ ප්‍රධානියාත් නොවන මේ ජනාධිපතිට සන්නද්ධ හමුදාවන්හි සේනාධිනායක ධුරය, සංහිඳියාවට අදාළ බලතල, පළාත් සභා පාලනය පිළිබඳ බලතල ඉතිරි කර තිබෙනවා. එතකොට මේ අනුර දිසානායක යෝජනා කරන ජනාධිපති හරියට සංක්‍රාන්තික ලිංගිකයෙකු වගේ වෙනවා.

‘ජනාධිපති දුබල වන විට පළාත් ආණ්ඩුකාරවරයා’

ඉහත කී ආකාරයේ ජනාධිපතිවරයෙකු හදලා එයාට පළාත් සභා පාලනය පිළිබඳ බලතල දුන්නාම මොකද වෙන්නේ? දැන් පළාත් ආණ්ඩුකාරවරයා භාවිතා කරන්නේ විධායක ජනාධිපතිවරයා ලබා දුන් විධායක බලය. මේ ආකාරයට ජනාධිපතිවරයා අබල දුබල කළාම පළාත් ආණඩුකාරවරයා ස්වාභාවිකවම අබල දුබල අයෙක් වන්නේ නැද්ද? මෙමගින් පළාත් සභා බලවත් වෙන්නෙ නැද්ද? දැනටමත් විධායක බලය නිසි පරිදි පාවිච්චි නොකරන නිසා උතුරු පළාත් සභාව රජයේ මුදලින්, සයනයිඩ් කරල කා මියගිය පළමු කොටි ත්‍රස්තවාදියා සැමරීමට ස්මාරකයක් හදනවා. ඒ විදිහට මධ්‍යම රජය සමග පළාත් සභා ගැටුමකට එන විට මුදුන දුර්වල නම් මොකද වෙන්නේ? අපි දන්නවා, බෙදුම්වාදීන්ගේ උපාය වී ඇත්තේ ඒ ගැටුම තුළින් තම අභිලාෂයන් කරා ගමන් කිරීම බව. දැන් උතුරු පළාත් සභාව ‘වවුනියාව දිස්ත්‍රික්කය තුළ සිංහල ජනයා ව්‍යාප්ත වීම පිළිබඳව සොයා බැලීමට විශේෂ කාර්ය සාධක බලකායක්’ හදලා තිබෙනවා. පසුගිය දිනවල උතුරු පළාත් මහ ඇමැති සී.වී විග්නේෂ්වරන් නිල වශයෙන් ජනසංහාර සතියක් නම් කරලා ලෝකයට කීවා ‘ශ්‍රී ලංකා ආරක්ෂක හමුදාවන් යුද අපරාධ සිදු කර තිබෙනවා. අපට නිදහස සහ ස්වාධීනත්වය අවශ්‍යයි’ කියා. මෙසේ ගැටුම හැදෙද්දී මුදුන හෙවත් මධ්‍ය දුර්වල කරලා පරිධිය බලවත් කිරිම සිදු කෙරෙන්නේ නව ලිබරල්වාදයේ උවමනාවටයි. මුදුන අවි රහිත කළ විට පරිධියෙන් එන ගැටුමට මුහුණ දෙන්නේ කෙසේද? ආණ්ඩුක්‍රම ව්‍යවස්ථාවට මේ බෙලහීනකම් ඇතුළත් කිරීමට තමයි 20 වැනි සංශෝධනය රැගෙන එන්නේ. ශ්‍රී ලංකාව ව්‍යූහාත්මකව අබල දුබල කිරීම්ට තමයි බටහිර බලවතුන් රනිල් වික්‍රමසිංහ අගමැති පුටුවේ වාඩි කෙරෙව්වේ, මෛත්‍රීපාල සිරිසේන මහතා ඩැහැ ගනු ලැබුවේ. ආර්ථිකමය වශයෙන් බෙලහීන කරන ලද රට දේශපාලනමය වශයෙන් අනාගතයේ දී කැබලිකරණය කිරීම දක්වා වූ න්‍යාය පත්‍රයකටයි 20 වැනි සංශෝධනය අදාළ වන්නේ. විදේශ විනිමය පනත සංශෝධනය කරලා කළු සල්ලිවලට ඉඩකඩ හදලා දෙනවා වගේ, 20 වැනි සංශෝධනයෙන් ඉඩකඩ හදලා දෙන්නේ බෙදුම්වාදී අන්තවාදී උවමනාවට වැඩෙන්න මිස එය පාලනය කිරීමට නොවෙයි. 20 වැනි සංශෝධනයෙන් ඉඩකඩ හැදෙන්නේ රට බෙදෙන පැත්තට මිස රට රැකෙන පැත්තට නොවෙයි. බලන්න, මේ 20 වැනි සංශෝධනයට පක්ෂ අය කවුද, කියා. ඇලෝසියස්ගෙන් චෙක්පත් ලබාගත් ගාමිණී වියන්ගොඩ, මේල් නර්ස් සමන් රත්නප්‍රිය, නව ආණ්ඩුක්‍රම ව්‍යවස්ථාව කරේ තියාගෙන ආපු ආචාර්ය ජයම්පති වික්‍රමරත්න හා නීතිඥ ලාල් විජේනායක ඒ අතර සිටිනවා. මේ අය සහායක ඩැනිලා වෙන කොටම තේරෙන්න ඕනේ මේ වැඬේ ‘අප්සට් එකක්’ කියා. මේ ඩොලර් කාක්කන් ටික හැමදාම හිටගත්තේ රට වනසන පැත්තේ. මම ජනතා විමුක්ති පෙරමුණේ ඉන්නකොට මේ අය ජවිපෙ ජාතිවාදී කියා විරුද්ධව හිටියා. අද ජවිපෙ අනුර කුමාර අතට ගියාම මේ අය ජවිපෙට පක්ෂයි. තමන්ට ඩොලර් පොම්ප කරන බටහිර හාම්පුතුන්ගේ න්‍යාය පත්‍රයට විරුද්ධ දේකට මේ අය පක්ෂ වෙයි ද? 20 කියන්නේ මේ අයගේ හාම්පුතාලට උවමනා දෙයක්. ඒ නිසයි ඔවුන්ගේ සහයෝගය ඊට ලැබෙන්නේ. ඔන්න බලන්න ජවිපෙ පොළා පැනීමේ ප්‍රමාණය.

‘රට විකාරයක් බවට පත් පත්කිරීම’

20 වැනි සංශෝධනයෙන් ජනාධිපති ධුරය අහෝසි වන්නේ නැහැ. ජනාධිපතිවරණය අහෝසි වෙනවා. ඒක ජනාධිපතිවරණය මළ ගෙයක් වගේ පේන රනිල් වික්‍රමසිංහට නම් හොඳයි. 2020 දෙසැම්බරයට ප්‍රථම පැවැත්විය යුතු ජනාධිපතිවරණයට අනුප්‍රාප්තිකයෙකු දැමීමට එකඟ වෙලයි රනිල් වික්‍රමසිංහ තවමත් එජාප නායකත්වයේ ඉන්නේ. දැන් සජිත්, අකිල, සාගල, මංගල වගේ අය බලා ඉන්නවා අනුප්‍රාප්තිකයා වෙන්න. නමුත් ජනාධිපතිවරණය අහෝසි වෙනවා නම් අනුප්‍රාප්තිකයෙකු උවමනා වන්නේ නැහැ. රනිල්ට සදාකාලිකවම නායකකමේ ඉන්න පුළුවන්. රාජ්‍ය නායකයා, කැබිනට් මණ්ඩලයේ ප්‍රධානියා වන විධායක අගමැතිවරයෙකු සහ සේනාධිනායකයා, පළාත් සභා පාලනය, සංහිඳියා බලය සහිත ජනාධිපතිවරයෙකු පත් වූ පසු මේ රට පාලනය කළ හැකිද? මේක රටම විකාරයක් වෙන වැඩක්.

‘ජෙපි ලොජික්’

‘20 වැනි සංශෝධනය ගෙන එන්නේ මේ රටේ ශිෂ්ටත්වය හදන්න’ කියා අනුර දිසානායක කියනවා. ‘ජනතාවගේ ඡන්දයෙන් ජනාධිපතිවරයෙකු පත් කරගැනීම අශිෂ්ටත්වයේ ව්‍යාපෘතියක්, අර්ජුන් ඇලෝසියස් වැනි කෙනෙක් ජනාධිපති ලෙස තෝරා ගැනීම ශිෂ්ටත්වයේ ප්‍රතිමූර්තියක් ’කියලයි මෙයා කියන්නේ. ඕවට කියන්නේ ‘ජෙපි ලොජික් ’ කියලයි. මේක අනුර දිසානායකගෙන් ශිෂ්ටත්වය ඉගෙනගත යුතු රටක් ද? ලෝකයේ මුල්ම රෝහල තනපු, ලෝකයේ මුල්ම තට්ටු ගොඩනැගිල්ල වන තට්ටු නවයක ලෝවාමහාපාය ගොඩනඟපු, ලොව මුල්ම සැත්කම් උපකරණ කට්ටලය හමු වුණු මේ රටට අනුර දිසානායකට ශිෂ්ටත්වය කියා දිය හැකි ද? එයාට නම් ශිෂ්ඨත්වයේ පාඩමක් කියා දිය යුතුව තිබෙනවා. බටහිර බලවතුන් ලිබියාවට ශිෂ්ටත්වය, ප්‍රජාතන්ත්‍රවාදය, ඒකාධිපතිවාදයෙන් තොර පාලනයක් ආදිය ලබා දීමට ආවා. අන්තිමේදී ශිෂ්ටත්වය, ප්‍රජාතන්ත්‍රවාදය පමණක් නෙවෙයි ලිබියාව ද වැනසී ගියා. ශිෂ්ටත්වය නැමැති වචනය තොරම්බල් කරමින් එන මේ අය අපේ රට ඇදගෙන යන්නේ අශිෂ්ටත්වයේ පතුල වෙතයි. මේ වෙලාවේ මට මතකයට එන්නේ ධර්මිෂ්ඨ සමාජයක් හදන්න ආපු ජේ.ආර් ජයවර්ධනව. අවසානයේදී මේ රටේ තරුණ තරුණියන් 60,000ක් 70,000ක් මහ මඟ මියගිහින් තමයි එය අවසන් වුණේ. ශිෂ්ටත්වය ගෙන ඒමට රැගෙන එන 20 වැනි සංශෝධනය රටට එවැනි දෙයක් උරුම කරාවි කියලයි මට හිතෙන්නේ.

‘ආත්ම කේන්ද්‍රීය ගණන් බැලීම් එපා‘

මේ 20 වැනි සංශෝධනයට අපි පාර්ලිමේන්තුවේ 2/3 බලය අහිමි කරන්න ඕනේ. දැන් අපට 2/3 අහිමි කරවන එක පහසුයි. ඒ, අගමැතිට එරෙහි විශ්වාසභංගය අවස්ථාවේදී එය පරදින බව දැන දැනම ඊට පක්ෂව ඡන්දය දෙමින් විපක්ෂයේ අසුන්ගත් ශ්‍රි ලනිප 16 කණ්ඩායම නිසයි. මේ 16 කණ්ඩායම රනිල්ට වඩා සතුරු කණ්ඩායමක් ලෙස සලකන අය අප අතරෙත් ඉන්නවා. තමන්ගේ ආත්ම කේන්ද්‍රීය ගණන් බැලීම් අනුව තෝරන්න ගියොත් වරදිනවා. සිරිසේන මහත්තයටත් වැරදුනේ ඒ නිසයි. එයා රාජපක්ෂලා එක් අයෙකු ‍හෝ ඩැඩි දෙනෙකු සමග තිබූ ‘ඔරොප්පුව’ නිසයි එවැනි තීරණයක් ගත්තේ. ඒ නිසා අද සිරිසේන මහත්තයා තම ගමන දිගු කර ගන්න හිතන අයෙකුට වඩා තම ගමනාන්තය ගැන හිතන අයෙකු බවට පත්වෙලා තිබෙන බවයි මම දකින්නේ. ‘හාර්ට්’ එකෙන් විතරක් හිතලා දේශපාලනයේදී තීරණ ගත්තොත් ‘හාර්ට් ඇටෑක්’ හැදෙන්න පුළුවන්. මේ 16 තමයි අපට පාර්ලිමේන්තුවේ 2/3 නැති කරන්න තිබෙන ප්‍රධානම අවිය. 16 හරියට වැළඳගත්තොත් තමයි අපට ඉතිරි 05-06 ගලවගන්න පුළුවන්. අපි කැමති අකමැති අය ඉන්න පුළුවන්. නමුත් අපිට ජාතික කේන්ද්‍රීයව ගණන් බලා අකමැති පුද්ගලයන් සමඟ සිටගන්න සිදුවන අවස්ථාවන් තිබෙනවා. අපි බලන්න ඕනේ රටට ජාතියට අපි ගන්න තීරණ වලින් සුගතියක් වෙනවද කියලයි. ඒ සුගතිය ඇති කළාට පස්සේ මේ 16 බුදු වුණත් මට කමක් නැහැ.

‘තක්කඩියෝ කවුද’

මේක අපි ප්‍රඥාවන්තව තීන්දු තීරණ ගන්න ඕන වෙලාවක්. අපි ප්‍රමාද වන මොහොතක් පාසාම මේ රණ්ඩුව අපේ රට නැවත ගොඩගත නොහැකි ප්‍රපාතයක් කරා රැගෙන යනවා. රණවිරු දඩයමට පාර කපලා, රටේ ජාතික ආරක්ෂාව දිනෙන් දින බිඳ වට්ටන කොට, ආර්ථිකය දිනෙන් දින බෙලහීන කරනකොට, නිහඬව ඉඳිමින් ‘අපි ජනාධිපතිවරණයේදී ඒ ඔක්කොම බලා ගනිමු’ කියා පැවසීම මම හිතන්නේ එක්තරා ආකාරයක තක්කඩිකමක් කියලයි. එච්චර කාලයක් නිහඬවව හිටියොත් ජනාධිපතිවරයකු පත් කරගෙන පාලනය කරන්න රටක් ඉතිරි වේවිද? කියන ප්‍රශ්නයයි අපි ඉදිරියේ තිබෙන්නේ.

‘මහින්දගේ ආණ්ඩුවක්’

ඒ නිසා අපි මේ ගමන වලක්වන්න ඕනෙ. ඒ සඳහා පාර්ලිමේන්තුවේ 2/3 අහිමි කිරීම පමණක් නොවෙයි, හැකි පළමු අවස්ථාවේදීම මහින්ද රාජපක්ෂ අග්‍රාමාත්‍ය තනතුරට ගෙනල්ලා මේ පාර්ලිමේන්තුව ඇතුළෙම අලූත් ආණ්ඩුවක් හදන්න ඕනේ. ඉන්පසුව ඒ ආණ්ඩුව භාරකාර න්‍යාය පත්‍රයක් ඇතිව ඉතිරි දුර ගමන් කරලා, ජනාධිපතිවරණය පවත්වලා, රටේ අස්ථාවරභාවය නතර කරලා ජාතිය නැවත හරිමග වෙත ගෙන එන්න ඕනේ. ඒ භාරකාර ආණ්ඩුව රට හරිමඟට ගත හැකි ජනාධිපතිවරයෙක් පත් වන දිනය තෙක් වන වැඩපිළිවෙළක් ජනතාව ඉදිරියේ තැබිය යුතුයි. ඒ සඳහා මේ 16 පමණක් නොව තවත් අය අපට අවශ්‍යයි. මේ විදිහට ගියොත් ජනාධිපතිවරයාගේ ආතතිය දිනෙන් දින වැඩිවෙනවා. එයට ඇත්තේ ද එකම විසදුමයි. මහින්ද රාජපක්ෂ මහතා අග්‍රාමාත්‍ය ධුරයට පත් කර නව ආණ්ඩුවක් පිහිටුවා එමඟින් රට හරි මඟට ගැනීමයි. එසේ කිරීමෙන් මේ රට මේ ‘අපාලිත’ තත්ත්වයෙන් ‘පාලිත’ තත්වයට පත් කරගත යුතු නැද්ද? රටකට දේශපාලන නායකයන් උවමනා රට අරාජික වන ආකාරය දෙස නිහඬව බලා සිටීමට නොවෙයි. රටක් නිවැරදි දිශාව වෙත රැගෙන යාමටයි. ඒ අභියෝගය අද අපි ඉදිරියේ තිබෙනවා. ඒ අතර විධායක ජනාධිපති ක්‍රමය අහෝසි කිරීම නැමැති සුන්දර ලලනාව ඉදිරියේ තබාගෙන රාජ්‍යයේ මුදුන දුර්වල කරලා ප්‍රාන්ත පාලනය බලවත් කරන බෙදුම්වාදී ව්‍යවස්ථා සංශෝධනය පරාජය කළ යුතුයි. එය අපි සියලු දෙනා ඉදිරියේ තිබෙන අනුල්ලංඝනීය වගකීමක්. හොරට නිදාගෙන ඉන්න අපට අයිතියක් නැහැ. රටත් ජාතියත් අවදි කොට විපත්තිදායක තත්වයෙන් මේ රට එළියට ගැනීම සඳහා අපි පෙරමුණ ගත යුතුයි.
මාතෘභූමියට ජයවේවා!
20 වැනි ව්‍යවස්ථා සංශෝධනය උපන්ගෙයිම භංගවේවා.! ”

අනුරුද්ධ බණ්ඩාර රණවාරණ
මාධ්‍ය ලේකම්
ජාතික නිදහස් පෙරමුණ
2018/06/09

About the Author
Wimal Weerawansa is widely regarded as an individual with great patriotism and strong principles

Leave a Reply

*

This site uses Akismet to reduce spam. Learn how your comment data is processed.