ඇමෙරිකානු සම්බාධකවලට එරෙහිව උත්තර ලංකා සභාගය කියුබාව සමඟ අත්වැල් බැඳගනී

“කියුබාවට එරෙහිව ඇමරිකා එක්සත් ජනපදය විසින් පනවා ඇති ආර්ථික, වාණිජ සහ මූල්‍ය සම්බාධක අවසන් කිරීමේ අවශ්‍යතාව” යන මැයෙන් කියුබා ජනරජය විසින් එක්සත් ජාතීන්ගේ මහා මණ්ඩලයට ඉදිරිපත් කරන ලද යෝජනාව සම්බන්ධයෙන් උත්තර ලංකා සභාගය විසින් අද (31) දින, ප්‍රකාශයක් නිකුත් කර තිබෙනවා.

උත්තර ලංකා සභාගයේ, සභාපති විමල් වීරවංශ මහතාගේ සහ එහි ප්‍රධාන ලේකම් ජී. වීරසිංහ මහතාගේ අත්සනින් නිකුත් කරන ලද සම්පූර්ණ ප්‍රකාශය මෙසේය.

“කියුබාවට එරෙහිව ඇමරිකා එක්සත් ජනපදය විසින් පනවා ඇති ආර්ථික, වාණිජ සහ මූල්‍ය සම්බාධක අවසන් කිරීමේ අවශ්‍යතාව” යන මැයෙන් කියුබා ජනරජය විසින් එක්සත් ජාතීන්ගේ මහා මණ්ඩලයට ඉදිරිපත් කරන ලද යෝජනාව කෙරෙහි උත්තර ලංකා සභාගය සිය අවධානය යොමු කරයි. මෙම යෝජනාව 2022 නොවැම්බර් 2 සහ 3 යන දිනවල විවාදයට ගැනේ.

කියුබාවට එරෙහි එක්සත් ජනපද සම්බාධක අපරාධ පිළිබඳ සවිස්තර වාර්තාවක් සමඟ කියුබාවේ එවැනිම යෝජනාවක් එක්සත් ජාතීන්ගේ සංවිධානයට ඉදිරිපත් කරන 30 වැනි අවස්ථාව මෙයයි.

එක්සත් ජාතීන්ගේ මහා මණ්ඩලය එය මීට පෙර සෑම අවස්ථාවකදීම පාහේ ඒකමතිකව හෙළා දැක තිබුණි. සම්බාධක අවසන් කිරීමේ සාධාරණ ඉල්ලීමට ලෝකය විසින් කියුබාවට ලබා දී ඇති බහුතර සහයෝගය නොතකා ක්‍රියාකිරීම තුළ , එක්සත් ජනපද රජය හුදකලාවී අපකීර්තියට පත්ව ඇත.

කියුබාවට එරෙහි සම්බාධකවල ප්‍රතිවිපාක මැන බැලීම සඳහා කියුබානුවන්ගේ හෘදය සාක්ෂිය බිඳ දැමීම, ඔවුන්ගේ සංවර්ධන මාවත පිළිබඳව කලකිරීම සහ අතෘප්තිය ඇති කිරීම අරමුණු කරගත් මෙම ප්‍රතිපත්තිය මගින් ඇති කරන ලද ඉතා බරපතල මානව හානිය සැලකිල්ලට ගැනීම අත්‍යවශ්‍ය වේ.

කියුබාවේ ආණ්ඩුක්‍රම ව්‍යවස්ථාමය රාමුව කඩාකප්පල් කිරීමේ පරමාර්ථය අසාර්ථක වී ඇත, නමුත් එය ආහාර, ඖෂධ, ඉන්ධන සහ අනෙකුත් මූලික අවශ්‍යතා සඳහා ප්‍රවේශය සීමා කිරීමෙන් කියුබානු පවුල්වලට හිඟය, වේදනාව සහ අසාධාරණ දුක් වේදනා ඇති කරයි. එය ජන සංහාරක ප්‍රතිපත්තියක් වන අතර එය මානව හිමිකම් සහ ජනතාවගේ ස්වයං නිර්ණයට ගරු කිරීමේ මූලධර්ම උල්ලංඝනය කරයි.

ලෝකයේ වෙනත් ඕනෑම රටකට මෙන් අවහිරයකින් තොරව සාමයෙන් ජීවත් වීමට කියුබාවට අයිතියක් ඇත. කියුබාවට එරෙහි මෙම ආර්ථික, වාණිජ සහ මූල්‍ය සම්බාධක ප්‍රතිපත්තිය අවසන් කරන ලෙස එක්සත් ජනපද පරිපාලනයට බල කිරීමට හඬක් නැගීම ශ්‍රී ලංකාවේ ජනතාවගේ යුතුකමකි.

උත්තර ලංකා සභාගය කියුබාවේ ජනතාව සමඟ සිය සහයෝගීතාව නැවත අවධාරණය කරන අතර කියුබානු රජය විසින් එක්සත් ජාතීන්ගේ මහා මණ්ඩලයට ඉදිරිපත් කරන ලද යෝජනාවට සහාය දෙන ලෙස ශ්‍රී ලංකා රජයෙන් ඉල්ලා සිටී..

විමල් වීරවංශ – සභාපති
ජී. වීරසිංහ – ප්රධාන ලේකම්